Ko tā te whakapaparanga kōrero nei he whakapuaki i te hononga i waenga i te tangata me te ao tūroa, e ai rā ki te ao Māori. Mai i te tīmatatanga, i ngā mātua tuatahi, i a Rangnui rāua ko Papatūānuku me ā rāua tamariki, ka whakaatuhia te hononga tahitanga o te whenua ki te moana, ki te rangi, ki ngā mea katoa hoki e ora ana. E whakamaumaharatia ana tātou ki tō tātou herenga ki te taiao mā te whakapapa, ki te mauri kei a tātou tahi e mau ana, ki te kawenga hoki kei a tātou hei haumanu, hei tiaki hoki i te mauri o ngā mātua e rua – o Ranginui rāua ko Papatūānuku – ngā rohe o ngā kaitiaki taketake me ngā mea katoa e ora ana i waenga i a rātou.
Mā te mārama ki tēnei ariā e kitea ai tā te Māori titiro ki te huringa o te āhuarangi me te urutaunga ki te āhuarangi i a tātou e whai nei kia taurite ā tātou mahi me ngā tikanga e pā ana ki te taiao.
"Me maumahara tātou ki te wāhi ki a tātou, ki te whakataurite hoki i tō tātou hononga ki te taiao," te kī a Tākuta Dan Hikuroa (Ngāti Maniapoto, Ngaati Whanaunga), ko ia tētahi Mātanga Pūtaiao mō ngā Pūnaha o Papa, he Ahonuku hoki i te Tari Māori o Waipapa Taumata Rau.
Kua roa te Māori e urutau ana ki te huringa o te taiao. Mai i te urutaunga ki te āhuarangi o Aotearoa nei i te hekenga mai i ō rātou toi whenua pārūrū, ki te whāinga o ngā hangarau hou i haria mai rā e tauiwi i tō rātou taunga mai ki ēnei takutai, kāore te Māori i urutau noa iho, engari i tōnui hoki. I te mahana haeretanga o te ao, i te kaha ake me te maha ake o te auau o ngā huarere taikaha, kua nui kē atu hoki te hiranga o te urutaunga ā-āhuarangi. Kei roto i te mātauranga Māori me ngā uara o roto i te ao Māori tētahi anga e rite ai, e urutau ai hoki te tangata ki te huringa o te āhuarangi.
I a tātou e hōpara ana i te urutaunga ā-āhuarangi hei painga mō te pakihi me te hapori, he mea nui te taurite. Pēnei i ngā tīpuna Māori, i whai rā i te tauritetanga i te ao tūroa, ko ngā hinonga e paku ana, e autaia nei hoki te rahi (SME), ka whakahāngai i ā rātou mahi ki ngā uara Māori e manawaroa ai, e urutau ai i te aroaro o te huringa o te āhuarangi.
ClimateWise - Te pai ake o te whakarite a te pakihi i te huringa o te āhuarangi
Ko ngā SME te tuaiwi o tā tātou ōhanga i Aotearoa, otirā, kei reira te 99 ōrau o ā tātou pakihi katoa. Heoi anō, ka arohia ana ngā uauatanga o te huringa o te āhuarangi, i te nuinga o te wā, ka whakaraerae ake te noho a ngā SME nā te korenga o te pērā rawa o te wātea mai o ngā pārongo me ngā rawa, tērā i ērā ka wātea atu ki ngā kamupene nui ake me te rāngai tūmatanui e whakariteritehia ana, ka mutu, he rahi ake ā rātou rawa. He maha ngā wā, ka kino kē atu ngā uauatanga ki ngā pakihi Māori e haere nei, i te nuinga o te wā, i runga i te iti ake o te whai monihua, ka mutu, he maha tonu rātou kei ngā rāngai e noho whakaraerae ana i ngā pānga mai o te huringa o te āhuarangi, arā, kei ngā ahumahi mātāmua me ngā mahi hanga hoki.
Ko ClimateWise, he kaupapa nā Climate Connect Aotearoa, tētahi pae ako tuihono e waihangā ana hei tautoko i ngā pakihi i Aotearoa kia rite, kia urutau ki te huringa o te āhuarangi. Ā tōna whakarewanga, hei te upoko o te tau 2025, ka horahia e te pae nei he rauemi e utu-kore ana, e māmā noa iho nei te whai māramatanga hei āwhina i ngā pakihi kia takatū i ngā maikiroa e pā ana ki te āhuarangi, kia whakahaere tūraru hoki. Ka aro a ClimateWise ki te mātauranga Māori me ngā uara o te ahurea, ā, ka tukuna ki ngā SME he rauemi hei whakaiti ake i ngā tūraru, e tautohua ai ngā ara wātea, e pakari ake ai te manawaroa, me te hāngai anō ki ngā tirohanga o te ao Māori.
Te mātauranga Māori me te urutaunga ā-āhuarangi
He māramatanga kahurangi kei te mātauranga Māori i te uruparetanga ki te huringa o te āhuarangi. Ina tirohia te taiao, ka hua mai i ngā tūhonohonotanga, ā, ka whai wāhi ki ngā tirohanga ki ngā tohu māori e kitea ana i ngā whanonga o te wai, o ngā tipu, o ngā kararehe me ngā tauira o te huarere. Mā te whakaaro ki tēnei huarahi i te whakaritenga o ngā rautaki hou e pā ana ki te āhuarangi, ka whai kaha ngā pakihi ki te waihanga i ētahi rongoā e whaihua ake ana, e toitū ake ana.
"Ko te wāhi matua ki te mātauranga Māori, otirā, ki ētahi atu mātauranga nō ngā iwi taketake, ko tāna he whakatōpū mai i ngā tirohanga o roto i ngā tau e hia rau nei o te noho ki aua wāhi, ki ētahi wāhanga rānei o aua wāhi rā." Tākuta Dan Hikuroa
Ko ētahi tauira o te urutaunga o te Māori ka kitea i ngā tikanga taketake i te putanga o ngā tohu taiao. Hei tauira, ka mārama ki te Māori te hiranga o te putanga mai, o ngā whanonga rānei, o ngā manu o tēnā rohe, o tēnā rohe, hei tohu i te tata mai o te marangai - ko te kārearea i tētahi rohe, ko te pūkeko i tētahi atu. Waihoki, te tūwhita kai i ngā iwi me ngā hapū, e tiakina nei mā te mātakitaki i te manahua mai, i te ngawhā haeretanga rānei o ētahi momo rākau, hei tohu i te nui o te huanga kai e tinga ana ā tōna wā. Kei ētahi atu anō kōrero whaiaro, ko ngā kōrero mō ngā whānau me ō rātou papakāinga i te hōtoke, i te raumati hoki i runga i te wātea mai o ngā kai i aua kaupeka tau, mō ngā marae hoki ka nekehia nā ngā huarere taikaha rawa atu.
Nā te māramatanga tōtōpū nei ki te taiao, me tōna hononga ki te maramataka, mā te aro anō hoki ki te whānau mārama, ka tautohu te Māori i ōna momo tohu i te taiao e whāiti ana ki tēnā rohe, ki tēnā rohe, i momoho ai rātou i taua taiao rā.
Mā te whai i ētahi wāhanga o tēnei mātauranga taketake, i ngā uara hoki o te ahurea i tōna taha, ka hora pea ētahi tautoko e whāiti ana, e whai take ana hoki ki ngā SME i Tāmaki Makaurau, puta noa hoki i te motu, e whakauruuru nei i ngā mātāpono e ōrite ana ki ērā o te mātakitaki me te urupare, i a rātou e urutau ana ki te huringa o te āhuarangi.
Ko ētahi pakihi Māori e rua e whai kē ana i ngā mātāpono mō te mātakitaki me ngā tikanga Māori, hei ārahi i ō rāua kaupapa ahumoni, ko Aotea Made, ko ia tētahi kamupene panipani taute i te kiri, me te kamupene pūngao parakore e whakawhanake tonutia ana, me Aotea Energy. Kei te moutere o Aotea ngā kaupapa e rua nei, i tīmataria rā e tētahi o reira, e Tama Toki (Ngāti Wai, Ngāpuhi), ā, e whakaurua ana e aua kaupapa e rua rā te mātauranga me ngā uara taketake ki te pakihi me te urutaunga ā-āhuarangi. Nā te whakatipuranga ōna e ōna tīpuna i te moutere, kua āta kawea e Toki ōna wheako whaiaro i te taiao, i ahu mai rā i tōna anō ao i te moutere, ki ana hinonga. Nā te angitu o te pakihi tuatahi, o Aotea Made, ka kōhure mai te hiranga kia mātua whāia he pūngao e parakore ana, e tū motuhake ana hoki. Ko te hua, ko te hanganga mai o tōna anō pūnaha pūngao e aropā ana mā te ngao kōmaru i Aotea, e āhei ai te 'koha' a te hunga whakamahi i te ngao tuhene ki te hapori.
Ka tirohia ana ngā huringa o te taiao i ngā tau tata nei i Aotea, tae atu ki te manahua mai o te mānuka, ki te putanga mai hoki o te kihikihi i te papa i ngā marama o te hōtoke, e whakapono ana a Toki, ka arohia ana te huringa o te āhuarangi, me titiro ki te whānuitanga tonutanga o te pūnaha. E tohutohu ana ia i ētahi atu pakihi, e whai nei i te tirohanga o te ao Māori ki ngā take e pā ana ki te āhuarangi, kia whakapā atu ki ētahi mātanga Māori, ā, kia "aratakina e te tikanga i ngā wā katoa".
Te hiranga o te urutaunga ā-āhuarangi ki te pakihi Māori
I runga i te hāngai ki te ariā o te ako, he āhuatanga nō te ao Māori, he tukanga te urutaunga ā-āhuarangi e whai ana i tētahi hurihanga auau, ā, e auroa ana hoki.
Ki ngā SME Māori, ehara i te mea e whakahirahira ana te urutaunga ā-āhurangi ki te kaitiakitanga o te taiao anake, engari e pērā ana hoki ki te auroa me te manawaroa o te pakihi. E tū ana ēnei pakihi ahakoa te iti ake o ngā rawa i ērā kei ngā kamupene rahi ake, e whakaraerae ake nei te noho i ngā tūraru āhuarangi. Ka hora i a ClimateWise ētahi rauemi e whaitake ana, e māmā ana hoki ki te kaiwhakamahi, hei tautoko i ēnei pakihi.
I ngā awheawhe inā tata nei, i whakahaerehia rā e Climate Connect Aotearoa me ētahi pakihi Māori, ka hua mai ētahi kaupapa kaupapa matua i te kōrero e arotahi ana ki te whakahangaitanga o ngā rautaki ki ngā uara o te ao Māori. Ka whai wāhi ki ēnei ko:
- Te kaitiakitanga i te taiao
Ko ētahi o ngā uara o te ao Māori, ko te utu me te manaakitanga, ka tautohua hei arotahitanga. Ko te utu arā, ko te tautuutu, ko te whakataurite anō rānei, e whakaatu ana i te kawenga kei a tātou ki te whakaū i te ora o tō tātou taiao. Ko te manaakitanga, i tēnei horopaki, koia ko te tiakanga o te taiao e te kaimahi, e te kirihoko, e te hapori hoki. Ka whai wāhi pea ki ngā tauira whakamahi ko te whakaurunga o te whakamahere i te auroatanga o te pakihi e tuku ratonga tonu ai ngā SME ki ō rātou hapori i te wā e rere ana ngā kaupapa e pā ana ki te āhuarangi, ā muri mai hoki.
- Te whakapapa me te whanaungatanga
Ka whakapuakina ēnei uara mā te whakaaro ā-tuku iho i ngā kōrero mō te orokohanganga o te ao, tae atu ki ngā whakataunga whakaaro a ngā mokopuna, me te mōhio tonu ki te taupuhipuhi o ngā mea ora katoa. I te ahunga kia torowhānui ake te huarahi, e tirohia ai ngā tūraru me ngā ara wātea e pā ana ki te āhuarangi, ka whai wāhi ki tērā ko ngā maharatanga e pā ana ki te taiao, ki te pāporitanga me te ahurea.
- Te mauri me te mana
E kīia ana ko te mauri he āhuatanga ka mahue iho i muri i ā tātou pāhekohekotanga ki te tangata, ā, he takunetanga hoki ki te taiao. Ko tāna he āki i ngā rangatira o ngā pakihi kia whakaarotia tā rātou e whai nei e pā ana ki te whakaahuatanga o ō rātou mauri e ētahi atu tāngata, e ngā reanga hoki e haere tonu mai ana. Ko te uara o te mana ka hua i ngā tini kaupapa; ka haere te wā, mā ngā ngā mahi e piki ai rānei, e heke ai rānei te mana. Ka kitea te kaha o te mana whaiaro me te mana o te pakihi i ngā whakahaere o te pakihi. Mā te urutaunga ā-āhuarangi, i te taha o ētahi atu mahere o te pakihi, ka ū te pai o te whakaaturanga o te mana o te takitahi, o te pakihi hoki ki a rātou anō, ki ā rātou mahi hoki i tēnei wā, ā haere ake nei hoki. Nō reira, he mea matua te mauri me te mana e tautiakina ai, e roa ai hoki te toitūtanga me te whakaaro nui ki te taiao.
Hei whakatepe: te whakapakari i te manawaroa o anamata
Ko te amorangi ki mua; ko te hāpai ō ki muri
E whakaatu ana tēnei whakataukī i te hiranga o te whakamahere me te whakarite.
Ka tū a ClimateWise hei rauemi puiaki mā nga pakihi puta noa i Aotearoa, e hora ai ētahi tohu ārahi e whai take ana ki te urutaunga ā-āhuarangi, hei āwhina hoki i a rātou ki te hōpara i ngā hua o te urutaunga ki te huringa o te āhuarangi. Ka hāngai tēnei huarahi ki tētahi ia huri noa i te ao, e āta whai nei, e āta whakamahi nei hoki i ngā tikanga pakihi e toitū ana, e noho haepapa ana hoki ā-taiao, ā-pāpori hoki, ka mutu, he ara poapoa anō tēnei i tētahi hunga kirihoko.
Mā te whakauruuru i te mātauranga Māori, mā te whakahāngai hoki i ngā tikanga pakihi ki ngā uara o te ao Māori, ka neke atu i te ora noa iho o ngā SME, eaoia, ka momoho i tētahi āhuarangi e hurihuri ana. Ka tautoko tēnei huarahi i te roa o te toitūtanga, i te manawaroa hoki o te hapori, e mahue mai ai tētahi taiao e ora ana, me ētahi pakihi e pakari ana, e manawaroa ana hoki ki ngā reanga ā haere ake nei.
Ka tū a ClimateWise hei kāinga mō ngā SME e toro ai rātou ki te mātauranga me mātua whai e rātou kia tū hei kaiarataki pai, otirā, i te mutunga iho, hei tīpuna pai.
